9 معتقدات خاطئة على الحيوانات

مقال من إعداد : صبرا موحي

كاين بعض الحقائق على الحيوانات لي كلشي كيعرفها، بحال أن البقرة كتنعس واقفة و بحال هادشي، ولكن كاينين بزاف ديال المعتقدات لي من شحال هادي و حنا متيقينها و هي في الأصل خاطئة، بحال:

1- الخفافيش ماكايشوفوش:

العكس تماما الخفافيش كيشوفو مزيان، بالرغم من أنهم كيعتامدو على السمع ديالهم كثر.عندهم واحد النظام لي كيخليهوم يصيفطو موجات فوق الصوتية لإنتاج صدى لي كيعاونهم يحددوا موقع الفريسة ديالهم واخا فالظلام. هاد النظام سميتو الSONAR و هو لي جات منو فكرة اختراع الرادار. و في الحقيقة، بعض الخفافيش عندهوم رؤية جيدة حتى فالصباح.

2- الثور كيشوف اللون الأحمر و كيخليه يهيج:

الثور ماكايشوفش اللون الأحمر أصلا، حيت عندو عمى ألوان ديال الحيوانات كايشوف غي الابيض و الأسود. راه الحركة ديال الثوب لي كتخليه يهيج ماشي اللون الأحمر أو الوردي. 

إوا دابا علاش فنظرك الماتادور مصارع الثيران كيختار الأحمر؟

3- النعامة كتخشي راسها تحت الأرض باش تخبا:

كاين واحد المعتقد تايقول بلي النعامة كتخشي راسها فشي حفرة حيت إلا ماكانتش كاتشوف لي غايهاجمها هادا كيعني أنه ماكايشوفهاش.

ولكن فالحقيقة النعامة كتخشي راسها باش دور البيض ديالها بالمنقار لي كتحطهوم ف دوك الحفر.

4- الحرباء كيتبدل لون ديالها على حسب الموقع:

الحرباء مكتبدلش لون ديالها على حسب الموقع ديالها باش تندمج معاه و تخبى. الحرباء كيتبدل اللون ديالها على حسب المزاج ديالها و باش توصل الأحاسيس ديالها لخرين بحال فاش كتعصب أولا كتحس باﻷمان. تقدر تقول محادثة كدوز بيناتهم ماكانفهموش حنا اللغة ديالها.

5- السمكة الذهبية عندها ذاكرة ديال 3 ثواني:

عكس المعتقدات فإن السمكة الذهبية تقدر تربط الأصوات بوقت الماكلة وتقدر تتعرف على مولاها، وهاد السلوكات كتطلب ذاكرة كتدوم كثر من 3 ثوان.

6- قمل الرأس كيفضل الشعر المزيت و الموسخ أولا الشعر النقي:

فلول كان كيسحابليهم بلي القمل كيفضل يتكاثر فالشعر المتسخ، من بعد كتشفو واحد النظرية بلي الشعر النقي أحسن ليهم من ناحية التنقل.

و تا حاجة من هادشي ماصحيحة القمل كيعجبو الشعر كيما كان ههه.

7- الكلاب كتشوف غا فلكحل و الأبيض:

فشحال من عام كان كيسحابلينا بلي الكلاب كيشوفو غير الأكحل و الأبيض، المهم، الكلاب يقدرو يشوفو الألوان ولكن ماشي تاللدرجة ديال الإنسان بطبيعة الحال.

القدرة ديال النظر ديالهم قريبة للإنسان لي عندو عمى الألوان ديال اﻷحمر و اﻷخضر.

- 8الخنازير قذرة:

الخنازير فالحقيقة قذرة بحالها بحال جميع الحيوانات. الخنزير ماكيعرقش وا بالتالي خصو شي طريقة باش يبرد بيها, و حفر الطين هي طريقة مناسبة ليه، حيث أن الطين كيمتص السخونية من الخنزير.

9- إلا قستي عصافير صغار بيديك الأم غادي تخلى عليهم:

الأم ماغاديش تخلى على العصافير الصغار ديالها بسباب ريحة الإنسان لأنه فالحقيقة أغلب العصافير عنهم قدرة الشم ضعيفة و ماغاديش تمكنهم يتعرفو على ريحتك.

المصادر : 1، 2، 3.